कल्पना विलास

कल्पना विलासात, मला फार रमता येत नाही ,
वास्तवाशी जोडलेली नाळ, तोडता येत नाही.
असं नाही की....
मी स्वप्नच पहात नाही.
पण दोन्हीत मला फारसं अंतर जाणवत नाही.
असं नाही की....
आभाळाला गवसणी घालायची, महत्वाकांक्षाच नाही, 
पण कदाचित माझं आभाळंच ठेंगण आहे.
असं नाही की.....
मी फार नशीबवान आहे,
किंवा फारच अल्पसंतुष्ट !
पण एवढं ठाऊक आहे
स्वप्न पहायला झोप 'यावी' लागते
आणि मला ती, रोजच्या रोज 'गाढ लागते'.
आणि तेवढंच मला पुरेसं आहे.
म्हणूनच कदाचित.......
कल्पना विलासात मला फार रमता येत नाही,
वास्तवाशी जोडलेली नाळ, तोडता येत नाही.
................निलिमा देशपांडे.१६/०८/२०१८, नवीन पनवेल.