नवसावित्री

नवसावित्री

नकोच मज तो, सात जन्माचा वायदा,
केला कुणी, वेठीस धरण्याचा कायदा ?

पाहिले कुणी रे, जनन मरणाचे चक्र?
नशीब, याजन्मी लग्नी नाही शनि वक्र.

ठाऊक मज आहे, न मिळेल दुजा कुणी,
तुझ्या सारखा सहचर, प्रेमळ अन् गुणी.

घेता, वैवाहीक जीवनाचा, मी रे परामर्श,
दिसती तृप्ती, समाधान, सौख्याची वर्ष.

नसावे ना, नाते परि इतके बंधनकारक ?
ठरेल ते, तुझ्या माझ्या भावनांना मारक.

हरेल काळ, इतकी श्रेष्ठ ना मी सावित्री,
सुख दुःखात असेल साथ, बाळग खात्री.

चल संपवू, इथले इथेच सारे भावबंध,
लिहील सटवाई, भाळी नवे ऋणानुबंध.

वाटले तुला मला, करू तेव्हाच करार,
पाहू खेळून नव्याने, हा लग्नाचा जुगार.

विसरून पूर्व प्रारब्ध, चल भेटू नव्याने,
हो तू नवा गडी, करू राज्य नवे सुखाने.

......... ...निलिमा देशपांडे.
२७/०६/२०१८, नवीन पनवेल.