सुख मौक्तिके

सुख मौक्तिके....

क्षण काही आठवता,
भासती ताजे तितके
वळण एक कितीदा,
खुणावी मज इतके

वाटे चुकलासा रस्ता,
प्रारब्ध मात्र ना चुके
ठरवलेली एकदा,
भेट खचित ना हुके

उभा समोर ठाकता,
अधीर नजर झुके
धडधड ती वाढता,
ईश ना थांबवू शके

लेणे सौभाग्याचे लेता,
कुबेराचे धन फिके
मिळे सदा ती तृप्तता,
घास जरी ओले सुके

रोज जगता जगता,
वेचली सुख मौक्तिके
साठवले सारे आता,
जरठ मनी कौतुके

मागे पाहता पाहता,
विरले ते धुके धुके
गोष्ट सांगता सांगता,
शब्द होती मुके मुुके
.......निलिमा देशपांडे.
०७/१०/२०१८,नवीन पनवेल.