शब्द

शब्द
शब्द शब्द जपुनी ठेव , बकुळीच्या फुलापरी....
जातील बघ विखरुनी, अवखळ वाऱ्यावरी.
पहावे शब्दांचे अंतरंग ,शब्द दर्शवतात रागरंग .
शब्द म्हणजे प्रीत, शब्द म्हणजे रीत, शब्द द्वेष, शब्द आवेश
शब्दांना असतात स्पंदन ,शब्दांनाही असतात बंधन.
शब्दांनाही असते जातपात, घडवून आणतात कधी घातपात,
असली जरी शब्दांना धार, लक्षत घ्याव फक्त त्याचं सार.
मान्य आहे, शब्द घालतात कधी वाद,
शब्दांमुळेच होतो तुझ्या माझ्यात विसंवाद,
पण साधून पाहिलास का कधी या शब्दांशी सुसंवाद ?
शब्द स्फुरतात, शब्द स्मरतात, शब्द उरतात,
नाही आले अधरी तरी... डोळ्यातुन झिरपतात ,
लेखणीतून उतरतात, कागदावर झिरपतात,
आणि मनात तुझ्या नाही का, घर करून रहातात?
शब्दांना केल  जर अंकित , हेच शब्द वाटतात संगीत.
शब्द असतात उभारी देणारे हात, पाहशील कधी, देऊन त्यांना साद ?
म्हणशील… शब्द करतात गोंगाट, अंतर्गत कलहांची वहिवाट.
पण एक गुपित सांगू ? तुझ मौन तरी कुठे निःशब्द असत ?
तुझ्याच शब्दात, तुझ अलवार गुज, मला सांगुन जात !
शब्द ऐकण्याचा आणि ऐकवण्याचा हा एक खेळ साधा,
याच शब्दांवरच तर निर्भर आहे, तुझ्या माझ्या विश्वाचा सांधा .
म्हणूनच…. शब्द माझा श्वास…शब्द माझा निश्वास,
शब्द माझा ध्यास… तुझ्या इतकाच प्रिय, मला शब्दांचा सहवास,
ठेवशील का एकदाच…. फक्त एकदाच… माझ्या या  शब्दांवर विश्वास?
………………………… निलिमा देशपांडे.